滙豐裁員

滙豐銀行宣佈中期業績時,已表明會全球裁員三萬人,但因為香港滙豐表現好,亞洲滙豐係未來希望,北美滙豐流血不止,歐洲滙豐味同雞肋,拉丁美洲滙豐羽毛未豐,故此一般以為滙豐裁員,唔會影響香港,此乃傳媒當時所得印象,滙豐亞太區行政總裁王冬勝好似亦係咁講過。

想唔到上星期滙豐竟然宣佈香港裁員三千人,佔總名額十分之一,份額之大,令人意想不到,即使全世界要交「人頭」,香港駛唔駛交咁多呀?工會批評滙豐賺錢而裁員,冇社會責任,係標準工會講法,全世界都一樣,毋須理會。電視台搵人評論此事,主持人與嘉賓一面倒咁話資本主義唔掂,自由市場唔掂,估唔到今時今日香港竟有人大力宣揚社會主義、政府規劃經濟嗰一套,信者必死。

滙豐裁員,應是從商業角度考慮,認為香港租金成本貴,員工薪酬高,可將後勤工作外判至印度、中國、菲律賓。林奮強近日講香港商廈租金升勢不止,一個秘書所佔嘅空間嘅租金可能貴過秘書份月薪,或者文員嘅月薪,繼續下去嘅話,銀行會將呢啲工作移至外埠,影響本地就業,解決方法之一係增加寫字樓土地供應,令到香港甲級商廈租金不要比星加坡高出兩三倍。但如此一來,必有人批評多建寫字樓是明益地產商,官商勾結,殊不知,如果職工盟、工聯會識得諗深一層,就唔好開口埋口鬧政府明益地產商,而係要求政府多想辦法(例如拆建中區政府合署西翼及中環街市),增加寫字樓供應,方可保住工人份工!

滙豐裁人之舉,短期着眼點係股價,要向基金投資者、分析師清楚顯示。歐智華係改革派,上台後削減成本絕不手軟,將來利潤增長有保證,足以支持股價回升。但長期來講,呢個大裁員決定是否適當?香港必將成為人民幣離岸中心,乃銀行必爭之地,滙豐在本港瘦身,並非明智之舉,左丁山見過交易員( dealer)升上最高職位, dealer精於短期賺快錢,對長期(以年計,不是以星期計)無耐性,歐智華是否如此,過兩三年先至知。 

左丁山
Advertisements

发表评论

Fill in your details below or click an icon to log in:

WordPress.com Logo

You are commenting using your WordPress.com account. Log Out / 更改 )

Twitter picture

You are commenting using your Twitter account. Log Out / 更改 )

Facebook photo

You are commenting using your Facebook account. Log Out / 更改 )

Google+ photo

You are commenting using your Google+ account. Log Out / 更改 )

Connecting to %s